Saturday, February 24, 2007

Liham kay Dr. Jose P. Rizal

Pebrero 6, 2007
Maestro Pepe,
Daantaon na ang lumipas mula ng ikaw ay barilin ng mga dayuhan sa Bagumbayan, ngunit ang alaala mo ay nananariwa pa sa aming puso at diwa. Tama ka sa iyong pagkakabasa Ginoo. Para sa akin, ikaw ang aking Maestro. Hantaran akong humahanga sa pakikipaglaban mo sa hamon ng buhay. Ni minsan ay hindi ka sumuko sa kahit anong laban kahit pa nga batid mo na ang lahat ay laban sa iyo. Hindi ka nasiraan ng loob na maisakatuparan ang iyong malinis na hangarin. Natatalos ko na marahil ang iba ay pagtatawanan ako sakaling malaman nila na ako ay pabor sa'yo. Oo Maestro, ikaw ang aking idolo. Hinahangaan ko ang maaaring sa iba'y kababawan ng iyong pagkatao, ngunit para sa akin ay kasing lalim at tibay ng iyong prinsipyo. Marami ang tumitingala sa iyo, marami din naman ang kumukutya. Ang iba'y natatakot kang pamarisan, sapagkat ang isip nila ay naka-sentro sa pagkilala sa'yo bilang si Rizal na halos perpekto. Ngunit sa akin ay iba. Kagaya mo, gusto kong maging ordinaryong estudyante noon. Ang mga grado ko'y maaaring mataas o katamtaman, maaari din namang may mababa. Ngunit ang mahalaga sa akin ay ang pagkatuto ko sa lahat ng aking ginagawa. Ayos lang libakin at ihambing sa iba. Ayos lang ipamukha nila ang aking pagkakaiba. Pagkat tulad mo, batid ko ang aking kakayahan. Alam ko kung saan ako dapat lumugar at kung paanong gamitin sa tama ang aking pinag-aaralan. Kagaya mo Maestro, ako ay ordinaryong estudyante lamang. Nagkakamali at mayroon ding kahinaan. Ngunit ang aking kahinaan ay siya ring kalakasan ko.
Maestro, gusto ko lang magpasalamat sa magandang pamanang iniwan mo sa amin. Nawa ang kaganapan ng iyong paghihirap na tinatamasa namin ngayon ay maghatid ng ligaya sa iyong puso.
Arriane G. Zamora
BSIT-4A
A+

No comments: